Muhammad Hussaìn e Nabi Ahmad a son intune stanzie dal ambulatori di Medisine legâl, in spiete di sedi tumiâts. A son alì, distirâts intal frêt in consecuence di sedi stâts masse dongje dal fûc, che a vevin impiât par scjaldâsi vie pe gnot. A son lâts sui Sfueis de nestre tiere par jemplâ pagjinis di croniche, come che aromai la “informazion” nus à maleducâts cu la scuse di scugnî contâ la croniche, ma dome chê nere, brute e scandalose dai puars che e fâs pice.
A prin jentri gjornâi e gazetins no ju àn nancje clamâts par no, ma dome pal Paîs, il Pakistan, dulà che a son nassûts e migrâts. E nol è par vie che ur plaseve fâ i turiscj, ma par vivi lôr e lis fameis. Ur varès plasût di restâ inte lôr tiere, magari a zuiâ di Cricket, che al è il sport nazionâl, biel che a son scjampâts lontan, intes tieris de bondance e libertât, cussì ur e vevin piturade la biele Talie.
Ur à lade une vore mâl, biâts zovins! E no dome pe fin che a àn fate, ma pal vie che no àn cjatade ni la Americhe, ni la Itale che a sumiavin. La croniche nere no à fat di mancul di fânus lei dute la schirie des ilegalitâts che a àn rivât a meti adun intai agns che a son stâts culì a torzeon. La liste e je lungje, ma, seont la maniere di viodi, che e dipent di dulà che o sin a vivi, e po sedi doprade o a parâsi par dî che la nestre societât e à fat il so compit di acet e lôr no àn aprofitât des ocasions, o ben, al contrari, come i lôr tentatîfs falîts di cjatâ cun onestât une biele strade par deventâ oms e citadins dignitôs e realizâts.
Impen la liste no ven scrite par contâ i lôr progjets falîts, ma par justificâ la nestre distance dai zovins in conflit cu la “legalitât”. No fasin biele figure nancje cualchi politicant udinês che ur dà la colpe al guvier citadin che al pant “une gjestion flape, confusionarie e par nuie buine di pupilâ lis personis e la citât”. Come che i puars ju vessin inventâts di pueste chei che a van su par aministrâ! I puars no sono simpri stâts e no ju vino simpri cun nô? Cussì al profetize il Vanzeli (Mateu 26,11), che nol faseve sociologjie, ma al distaponave lis falsetâts e al cjalave la vite cui voi libars, umans e solidaris!
I puars a van a passâ la gnot intes cjasis e cjasâi bandonâts de perifarie, che e je ancje chê dal nestri cûr. No vevie cjatât un puest par lôr a Betlem ancje a la fameute che e spietave il Prin Fi? (Luche 2,7). Se nol è puest par lôr dulà àno di lâ? E, parâts vie di un puest, par vie dal “decor” de citât, no vano intun altri plui lontan, e fûr dai voi di chei che ur intrighin ancje inte cussience? Impen di bacilâ a sdrumâ lis cjasis vueidis no si podaressie trasformâlis in puescj di acet? Impen di berlâ cuintri dî chei che a guviernin a turni e di passaç, no si podaressie sentâsi e fâ su insiemi une politiche a pro dai ultins e di chei che no rivin a tignî il pas di buride in cheste societât che e je buine di doprâ cun perizie dome la centrifughe?
I ultins a cjatâju vîfs, forsit a son stâts chei de Caritas inte Stazion de Pueste e che a van a viodi vie pe gnot dulà che a stan, impen dal Fogolâr (Asîl de gnot). No vegnin o par vie che nol è puest o par vie che nissun ju à scoltâts e ur à dade une man. Masse voltis si fâs finte di alzâ lis mans e rindisi disint: “O vin fat dut ce che o podevin o la leç nus permet di fâ”. Sot vie si intint: “Viodeit voaltris dai puars!”
Puare umanitât e puare culture umane, sociâl e civîl. No staressino ducj plui ben e contents se ducj a podessin stâ ben, adiriture chei che pes nestris categoriis etichis nancje no mertaressin! Cussì si compuarte cun nô il Pari dal cîl e nus al à fat viodi ogni zornade de sô vite so Fi Gjesù, il fradi di ducj chei che a son su la tiere, che no je nestre, ma di Diu Pari, che nol met confins e nol domande passepuarts par jentrâ in Cîl.
Pre Vigji Glovaz
Segui le attività della Caritas diocesana di Udine sui social
Condividi questo articolo
