Miercus 2 di Lui o vin fat fieste inte Cort de canoniche di Trivignan. A son passâts bielzà dîs agns co la vin riformade e screade par che a jentrassin oms che a vevin bisugne di une cjase-famee par tornâ in sest inte lôr vite masse dissestade. La canoniche e jere il spieli de lôr vite, avonde mâl sestade e mieze bandonade, ma che e podeve ancjemò ripiâsi e inviâ la cjaminade de vite.
Dut biel: sot sere de zornade cjalde di Lui; il bearç cul sotet dulà parâsi dal cjalt; il colp di voli su la canoniche, la glesie cu la façade blancje e zale di San Todaro; 4 ciprès a drete e a çampe a insiorâ di vert il cuadri; biele int a fâ fieste. Prin di dut chei che a son a stâ inte canoniche ristruturade; i operadôrs che ju compagnin inte cjaminade par tornâ a gjoldi dal sintiment, de salût e la voie di stâ cun chei altris; i lôr coleghis e ospits des cjasis di acet di Çupicje, Tumieç e Beivârs; i volontaris di Trivignan e di Palme; i predis e lis Muiniis dai Salesians di Sante Marie e di Pavie di Udin; Dino Strissul, president di Betanie, cui Assessôrs de Comune, di Remançâs e il sindic di Palme; lis Assistentis sociâls di Palme, Gonârs e dal Tor di Zuìn e altris che a jerin a fâ fieste e che no ju met inte liste, stant che a son bielzà tancj. Ma no ài di lassâ fûr, chel po no, ancje la Fabriçarie di Trivignan, Mehdi, che nus à sunât cul Tār, un strument dal Iran, il so Paîs, a ûs un liût cu la casse di risonance di doi cûrs tacâts; il fotograf che al veve picjâts su la muraie i ritrats des musis dai Asilants; i frutats di Pavie che a manovravin la consolle par burî fûr une musiche adate a fâ balâ la int ancje intal caligo.
Insome une fieste di curtîl-borc cun int, i ospits, no usade a gjoldi la compagnie, ma ben segnade a dêt, di tignîsi in bande di jê e di no praticâle. Int intaiade la muse e il cuarp dai faliments e des burascjis de vite. Cun lôr a jerin ancje operadôrs, che ur fasin di volan par che a tornin a inviâsi. Po’: Predis e Muiniis, che no mancjin mai intal mieç de puare int e Aministradôrs, chei che ur stan a cûr la int semplice e no dome la scuadre di balon e lis cenis cui benestants e i impresaris dal paîs. Biele int che no si vergognave di stâ insiemi cui falîts de vite, cun chei che no mostrin il tacuin sglonf intal sachetin daûr dal cûl, cun feminis e oms che nissun cîr par morosâ o passâ la ore in compagnie. Ce misteri la vite! E covente simpri une ocasion par sintîsi ducj de stesse famee umane, feminis e oms, biei e chei fats diferents, siôrs e puars, blancs e scûrs di muse, fortunâts e disfortunâts, cu la sgumilicje intacade intal cûl dai bregons e de cotule.
La fieste e à vût dut ce che al covente par vê agrât di sedi stâts: un moment di riflession di Dino sul parcè e il cemût che o jerin culì; lis personis che a vevin vût acet in altris cjasis e vuê a cjaminin cu lis lôr gjambis; une famee marochine che e vîf a San Zuan. La femine e jere cul om e i doi fîs e e veve puartât par ducj un plat grant di cuscùs e il tè cu la mente, che al jere la fin dal mont. O jerin sentâts suntune bale di stran a gjoldilu, cuntune volontarie di San Zuan e nus pareve di sedisi simpri cognossûts.
La fieste e je sclopade co i fantacins a àn inviade la musiche. Un pocjis di feminis a àn tacât a balâ. Alore al è colât l’ultin muret di separazion tra siôrs e puars, tra i biâts e chei che si crodin normâi e ducj si son metûts a movisi al invît de musiche. Feminis, che pal plui nissun cîr, a jerin balarinis di no crodi, oms, plui intrigâts, a movi i pas par dâur seont e ducj fîs dal stes Pari che nus fâs fradis e sûrs. O jerin propit inte Cort dai Miracui, come che la vevin batiade cun dute la int dal paîs za fa dîs agns, co o vin dit Messe inte glesie.
Un moment di gracie che si varès di vivi in ducj i paîs dal Friûl, massime in chei che si tegnin distants de puare int par pôre di pierdi la lôr dignitât. No sano, ducj chescj, che chei che la dignitât la à pardabon, nissun po puartâure vie!
Pre Vigji Glovaz
Foto di di Alexander Grey (Unsplash)
Segui le attività della Caritas diocesana di Udine sui social
Condividi questo articolo
